Sumardagurinn fyrsti 2008 á HNLFÍ
HNLFÍ heldur upp á sumardaginn fyrsta með því að bjóða gestum og gangandi að neyta sérstaks hádegisverðar og síðdegishressingar á stofnuninni í tilefni dagsins.
Kjöt er ekki á matseðlinum en boðið er upp á fiskrétt tvisvar í viku og mikið framboð er af mjólkurvörum. Ekki er boðið upp á kaffi en þess í stað er boðið upp á venjulegt te og te hússins sem er gert úr þekktum íslenskum lækningajurtum. Litið er á matinn sem hluta af fræðslu og meðferð dvalargestanna. Þeir sem eru í megrun fá fræðslu um rétta skammtastærð, einnig er boðið upp á orkubætt fæði og næringardrykki fyir þá dvalargesti sem á því þurfa að halda. Þeir sem þurfa á sérfæði að halda fá ráðgjöf hjá næringarráðgjafa. Reglulega er boðið upp á sýnikennslu í gerð grænmetisrétta sem matreiðslumeistari sér um.
Það er stefna HNLFÍ að hafa sem minnst af unnum matvælum, við veljum okkar hráefni mjög vandlega og allur matur er eldaður frá grunni á staðnum.
Brauðið er bakað á staðnum og er 100 % heilhveiti. Hluti af grænmetinu og öðrum matjurtum sem boðið er upp á er lífrænt ræktað í eigin gróðurhúsum. Gróðurhúsin og allt landsvæði Heilsustofnunar er yfirlýst svæði án erfðabreyttra lífvera.
Sumarlokun vegna framkvæmda
Í sumar verður Heilsustofnun NLFÍ (HNLFÍ) lokað í fjórar vikur, frá 6. júlí til 6. ágúst. Unnið verður að nauðsynlegum lagfæringum á 28 herbergjum á Gullströnd en sú álma var tekin í notkun árið 1975.
Árlega koma um 1800 dvalargestir í læknisfræðilega endurhæfingu á HNLFÍ og um 500 læknar senda okkur endurhæfingarbeiðni fyrir sína skjólstæðinga. Meðaldvalartími er fjórar vikur. Frá stofnun HNLFÍ árið 1955 hafa tugþúsundir Íslendinga fengið einstaklingsmiðaða endurhæfingu hér.
Nauðsynlegt er að loka stofnuninni í þessar fjórar vikur á meðan lagfæringar standa yfir. Lögð er áhersla á að upplýsa skjólstæðinga okkar, heimilislækna, sérfræðinga og aðra þá sem vísa á eða nýta sér þjónustu HNLFÍ, um þessa lokun. Við minnum á að beiðnir þurfa að berast sem fyrst vegna innlagna eftir 6. ágúst.
