Úgjöld til heilbrigðismála
Þegar borin eru saman útgjöld heimilanna á Íslandi til heilbrigðismála þá greiða þeir sem koma til dvalar á Heilsustofnun NLFÍ aðeins um 5,5% hærra fyrir dvöl sína en meðaltals greiðsla þeirra er innan íslenska heilbrigðiskerfisins. Bæta má við að gestir Heilsustofnunar fá gistingu og fæði til viðbótar við fullar meðferðir fyrir þessi auka 5,5%.
sjá nánar frétt úr MBL
Heildarútgjöld til heilbrigðismála hafa vaxið verulega síðasta aldarfjórðung eða úr ríflega 6,3% af landsframleiðslu í upphafi níunda áratugarins í ríflega 9,3% af landsframleiðslu á síðasta ári.
Fram kemur í nýjum Hagtíðindum Hagstofunnar, að þetta hlutfall samsvari 143,5 milljörðum króna á verðlagi síðasta árs. Hæst voru útgjöldin hlutfallslega árið 2003 eða 10,4% af landsframleiðslu.
Hagstofan segir, að af heildarútgjöldum til heilbrigðismála greiði hið opinbera 115,6 milljarða króna og einkaaðilar 27,9 milljarða. Á þremur áratugum hafi útgjöld hins opinbera til þessa málaflokks aukist úr 5,5% af landsframleiðslu í 7,5%. Á sama tíma hafi útgjöld heimilanna ríflega tvöfaldast, úr 0,8% af landsframleiðslu í 1,8%.
Hlutur heimilanna hefur aukist verulega frá 1980 eða úr 12,8% af heildarútgjöldum í 19,5% árið 2010. Hámarki náði hlutur þeirra árið 1998 þegar hann nam 19,6% af heildarútgjöldum til heilbrigðismála.
Hagstofan segir, að í byrjun níunda áratugarins hafi heilbrigðisútgjöld verið um 52 milljarðar króna á verðlagi 2010 en ríflega 143 milljarðar árið 2010. Heilbrigðisþjónustan hafi því nærri þrefaldast að magni á þessu tímabili.
Heilbrigðisútgjöld á mann voru hins vegar um 451 þúsund krónur árið 2010 en 226,5 þúsund krónur í byrjun níunda áratugarins á verðlagi 2010 og hafa því nærri tvöfaldast síðustu þrjá áratugi. Á árunum 2002-2009 stóðu þau nánast í stað og voru um 470-485 þúsund krónur á mann á sama verðlagi. Árið 2010 lækkuðu þau í 451 þúsund krónur á mann, einnig á sama verðlagi.
Heildarútgjöld til heilbrigðismála í ríkjum OECD voru að meðaltali 9% af vergri landsframleiðslu ríkjanna árið 2008 en mikill munur er á því hlutfalli milli einstakra ríkja.
Í Bandaríkjunum var hlutfallið t.d. 16% árið 2008 en 5,9% í Mexíkó. Hér á landi voru heildarútgjöld til heilbrigðismála 9,1% af vergri landsframleiðslu árið 2008, 9,7% árið 2009 og 9,3% árið 2010. Svíar vörðu 9,4% af vergri landsframleiðslu sinni til heilbrigðismála árið 2008, Norðmenn 8,5%, Frakkar 11,2% og Svisslendingar 10,7%. Á þennan mælikvarða voru Íslendingar í 14.–15. sæti OECD-ríkjanna.
