_711_180.jpg)
Heilsustofnun NLFÍ í Hveragerði fær gæðastaðal ESPA
Gæðastaðall ESPA
Samtök Evrópskra Heilsustofnana (ESPA) eru samtök heilsustofnana með aðsetur í Brussel. Innan vébanda þeirra eru 24 aðildarfélög frá 21 löndum Evrópu en innan vébanda aðildarfélaganna eru 838 heilsustofnanir. Helsta stefnumál þeirra er að vinna að samstarfi félagsmanna, byggja upp þekkingu og gæta að hagsmunum félagsmanna sinna. Eitt meginverkefni þeirra síðustu árin hefur verið að þróa gæðastaðla. Þessir staðlar (quality standards) eru til þess að tryggja gæði starfseminnar, þ.e. meðferða og húsnæðis. Staðlarnir eru veittir stofnunum eftir ítarlega úttekt og verða þær að standast 80% af kröfum samtakanna til að fá gæðamerki ESPA sem kallast EUROPESPA.
Úttektin tekur til yfir 400 mismunandi atriða, helstu flokkar eru:
- gæða og öryggismála
- meðferða og hvíldaraðstöðu
- aðstöðu til lækninga
- sund-, bað-, og gufuaðstöðu
- gistiaðstöðu
- matsals og eldhúss
- annarrar meðferðaraðstöðu
- frístundamöguleika jafnt á stofnuninni sem og í nágrenni hennar.
Heilsustofnun NLFÍ í Hveragerði, sem er meðlimur í ESPA, var veittur þessi gæðastaðall þann 8. september 2007. Heilsustofnun er stofnun númer 20 til að fá þessa viðurkenningu hjá ESPA.
Framkvæmdastjóri ESPA Mr. Joachim Lieber afhenti stjórnarformanni stofnunarinnar, Gunnlaugi K. Jónssyni og framkvæmastjóra hennar, Ólafi Sigurðssyni gæðavottorðið á Landsþingi NLFÍ í Hveragerði.
Sumarlokun vegna framkvæmda
Í sumar verður Heilsustofnun NLFÍ (HNLFÍ) lokað í fjórar vikur, frá 6. júlí til 6. ágúst. Unnið verður að nauðsynlegum lagfæringum á 28 herbergjum á Gullströnd en sú álma var tekin í notkun árið 1975.
Árlega koma um 1800 dvalargestir í læknisfræðilega endurhæfingu á HNLFÍ og um 500 læknar senda okkur endurhæfingarbeiðni fyrir sína skjólstæðinga. Meðaldvalartími er fjórar vikur. Frá stofnun HNLFÍ árið 1955 hafa tugþúsundir Íslendinga fengið einstaklingsmiðaða endurhæfingu hér.
Nauðsynlegt er að loka stofnuninni í þessar fjórar vikur á meðan lagfæringar standa yfir. Lögð er áhersla á að upplýsa skjólstæðinga okkar, heimilislækna, sérfræðinga og aðra þá sem vísa á eða nýta sér þjónustu HNLFÍ, um þessa lokun. Við minnum á að beiðnir þurfa að berast sem fyrst vegna innlagna eftir 6. ágúst.
