11.11.2011 12:11:31
Hreyfing og baráttan gegn offitu efst á baugi

Af mbl.is 10.nóvember 2011 - Við erum einmitt að reyna að taka á því sem okkur finnst vera efst á baugi og það er meðal annars offita, þessi tilhneiging þjóðarinnar til að þyngjast með öllum þeim afleiðingum sem við vitum að það hefur á heilsufar og svo líka ýmislegt annað sem skiptir máli,« segir Elínborg Bárðardóttir, heilsugæslulæknir og formaður framkvæmdanefndar Fræðsludaga heilsugæslunnar, sem fara fram í dag.

Hún bætir við að vitað sé að hreyfing hafi jákvæð áhrif á offitu en hins vegar sé spurning hvernig hún hafi áhrif, þ.e. hvort áhrifin séu einungis líkamleg eða hvort hreyfing hafi einnig andleg áhrif.

Að sögn Elínborgar er heilsugæslunni í sjálfu sér engin takmörk sett. Heilsugæslan sé gjarnan fyrsti viðkomustaður fólks í heilbrigðiskerfinu og því verði starfsmenn hennar að geta tekið á nánast hvaða vandamáli sem er eða a.m.k. vísað sjúklingum á réttan stað. Einmitt af þessum sökum er boðið upp á mikinn fjölda mismunandi erinda á Fræðadögum, allt frá kennslu í vinsælu tölvupóstforriti yfir í fyrirlestra um fjölbreytt málefni á borð við t.d. hreyfingu, offitu, geðheilsu, endurhæfingu og lyfjaávísanir. Elínborg segir ekkert sérstakt heildarþema vera á Fræðadögum en í þetta skipti sé nokkuð mikið fjallað um hreyfingu og heilsu.

Elínborg segir Fræðsludaga þjóna þeim tilgangi að auka fræðslu heilbrigðisstarfsmanna en einnig stuðli þeir að auknum tengslum slíkra starfsmanna og styrki liðsheildina. »Því betur upplýstir sem allir starfsmenn eru því betra verður starfið,« segir Elínborg. Hún bendir jafnframt á að búist sé við því að heilbrigðisstarfsmenn frá öllum landshornum mæti á Fræðsludaga til þess að kynna sér þau fjölmörgu erindi sem þar eru í boði.

Hreyfing sem meðferðarform

»Hreyfing sem meðferðarform er búið að vera í gangi í Bretlandi og í fleiri löndum í heiminum í nokkuð mörg ár, ég er að koma heim til að halda erindi um gildi þess að nota hreyfingu sem meðferðarform,« segir Ingibjörg Jónsdóttir, lífeðlisfræðingur og yfirmaður Streiturannsóknarstofnunar Gautaborgar, en hún heldur erindi um hreyfingu sem meðferðarform á Fræðsludögum heilsugæslunnar.

Að sögn Ingibjargar nýtist hreyfing vel í meðferð við alskonar heilsufarsvandamálum. Þannig skipti hreyfing og mataræði miklu máli í baráttunni gegn offitu en hreyfing sé einnig eitt af fyrstu meðferðarúrræðunum sem gripið er til þegar fólk greinist með sykursýki. Ingibjörg segir að á Norðurlöndum og í Bretlandi sé nú þegar farið að mæla með hreyfingu sem meðferðarúrræði við vægu þunglyndi. Hún bendir á að hreyfing virki jafnframt vel sem meðferðarúrræði við streitu. »Hreyfingin hefur rosalega mikil áhrif á þá sjúkdóma eða geðraskanir sem eru tengdar streitu, það er að segja þunglyndi, kvíða, kulnun og síþreytu,« segir Ingibjörg sem bætir við að hreyfing skipti þessa sjúklinga mjög miklu máli sem hluti af meðferð.

Auka þarf hversdagshreyfingu

»Hversdagshreyfingin skiptir í raun og veru meira máli en að fara t.d. í tvo hjóla- eða eróbiktíma á viku,« segir Ingibjörg.

Hún tekur einnig fram að auka þurfi fræðslu um mikilvægi hversdagshreyfingar. Ingibjörg bendir á að 63% af öllum sjúkdómum í heiminum í dag stafi af lifnaðarháttum fólks. Loks hvetur Ingibjörg yfirvöld til þess að passa upp á aðgengi göngu- og hjólreiðamanna þegar verið er að skipuleggja götur.

Til Baka