_711_180.jpg)
Fræðingur fylgist með næringunni
Misjafnt er hversu mikið sveitarfélög fylgjast með gæðum og næringargildi máltíða grunnskólabarna, enda ber þeim í sjálfu sér engin lagaleg skylda til þess. Sum sveitarfélög ráða næringarfræðinga til þessa starfa, þar á meðal er Garðabær. Enginn slíkur er starfandi í Reykjavík.
»Við fáum matseðla átta vikur fram í tímann og sendum þá til óháðs næringarfræðings, sem skoðar næringargildi, birgjana og samsetninguna á matnum,« segir Margrét Björk Svavarsdóttir, forstöðumaður fræðslu- og menningarsviðs Garðabæjar. »Matseðlarnir fara líka til skoðunar hjá foreldrafélögunum, sem eru oft með matarnefndir.«
Næringargildi og hollusta
Að sögn Margrétar fer næringarfræðingurinn að auki einu sinni til tvisvar á ári í alla skóla bæjarins til að fylgjast með skömmtun og útbúnaði í eldhúsum. »Við erum að þessu til að bæta þjónustuna, við viljum geta boðið börnunum upp á næringarríkan og hollan mat. Við rákum okkur á það fyrir nokkrum árum að hráefnið var ekki eins gott og við hefðum viljað. Til dæmis var meiri fita í matnum en æskilegt var. En staðan er gjörbreytt í dag.«
Enginn næringarfræðingur starfar á skóla- og frístundasviði Reykjavíkurborgar. »Við vorum með næringarfræðing að störfum, sem var ráðgjafi varðandi skólamáltíðir, en staða hans var lögð niður árið 2008,« segir Sigrún Björnsdóttir, upplýsingafulltrúi á sviðinu. »En nú erum við með starfsfólk á skóla- og frístundasviði sem tekur að sér þetta ráðgefandi hlutverk.«
Starfshópur á vegum borgar
Sigrún segir að það sé stefna borgarinnar að ráða einungis menntaða matreiðslumenn til starfa í skólunum og að það hafi tekist í flestum tilvikum. »Þeir eiga meðal annars að kunna að reikna út næringargildi matvæla og þeirra starf felst í að tilreiða næringarríkan og fjölbreyttan mat.«Að sögn Sigrúnar var nýverið settur á stofn starfshópur sem móta á framtíðarstefnu um skólamáltíðir, með sérstakri áherslu á næringargildi, samkvæmt viðmiðum embættis landlæknis.
Úr Morgunblaðinu 15.nóvember 2011
