Forstjóri HNLFÍ

Haraldur Erlendsson Haraldur Erlendsson er forstjóri og yfirlæknir Heilsustofnunar. Haraldur útskrifaðist frá læknadeild Háskóla Íslands árið 1985. Hann vann við afleysingar á Heilsuhæli NLFÍ í Hveragerði á árunum 1977-85, starfaði í fimm ár á Borgarspítalanum, m.a. við endurhæfingarlækningar á Grensásdeild, auk þes sem hann starfaði á tauga- og lyfjadeild spítalans.
Haraldur nam taugalækningar við Lundúnaháskóla árin 1991-1992. Eftir að hann kom heim starfaði Haraldur í fimm ár við heimilislækningar víða á landsbyggðinni. Hann var m.a. læknir á Flateyri þegar snjóflóðin féllu þar árið 1995.
Haraldur lauk meistaranámi í geðlækningum við Lundúnaháskóla árið 2001 og hefur starfað sem sérfræðingur í geðlækningum í Bretlandi síðan þá, m.a. á réttargeðdeildum síðustu árin. Hann varð fullgildur meðlimur Konunglega breska Geðlæknafélagsins árið 2000. Haraldur hefur sérhæft sig frekar í ýmsum meðferðum við áföllum og skyldum vandamálum, t.a.m. ýmsum aðferðum í dáleiðslu. Auk þess lærði hann nálastungulækningar. Hann var yfirlæknir einkasjúkrahúss í Yorkskíri á árunum 2006-2009. Árið 2008 vann deild sem hann veitti forstöðu til svokallaðra Laing og Buisson verðlauna en það eru virtustu verðlaun á sviði heilbrigðisþjónustu sem veitt eru innan einkageirans á Bretlandseyjum.
Hugsjón hans er að Heilsustofnun skuli veita bestu hefðbundna heilsuþjónustu sem völ er á, en að auki skuli þar ástunduð alhliða og heildræn heilsurækt í víðasta skilningi og að þar verði hægt að virkja manninn á öllum sviðum. Hann telur að dvöl á Heilsustofnun eigi að vera einstök og lífseflandi reynsla sem opni dvalargestum nýja lífssýn, geri þeim mögulegt að sigrast á innri vandamálum, leyfi þeim að gleðjast og njóta samveru en einnig að nálgast innri kjarna eigin sjálfs.

Yfirlæknir kemur fram fyrir hönd stofnunarinnar vegna þeirra málefni er heyra undir hann og ber ábyrgð á faglegum rekstri hennar í samræmi við starfsskyldur lækna. Yfirlæknir skal sjá til þess að lækningar á stofnuninni séu ávallt í samræmi við stefnu og markmið stofnunarinnar og annast tengsl við stofnanir og aðila innan lands og utan í sambandi við samstarf og endurmenntun á sviði lækninga. Yfirlæknir situr í framkvæmdastjórn ásamt framkvæmdastjóra rekstrar og framkvæmdastjóra hjúkrunar.

Framkvæmdastjóri hjúkrunar
	Margrét Grímsdóttir er framkvæmdastjóri hjúkrunar við Heilsustofnun NLFÍ. Margrét útskrifaðist sem hjúkrunarfræðingur frá Háskóla Íslands árið 1996. Hún lauk meistaranámi í klínískri félagsráðgjöf (MSW) frá Boston University árið 2001 og starfaði eftir útskrift við Shands háskólasjúkrahúsið í Gainesville, Flórída. Á árunum 2009-2012 starfaði hún sem hjúkrunardeildarstjóri á göngudeildinni á Kleppi. Margrét er einnig stundakennari við félagsráðgjafadeild HÍ og lýkur námi í fjölskyldumeðferð vorið 2013.
Framkvæmdastjóri rekstrar
	Ósk Gústafsdóttir hóf störf hjá HNLFÍ í nóvember 2011 en starfaði á fyrirtækjasviði KPMG í fjögur ár áður en hún kom til HNLFÍ. Hennar helstu verkefni voru m.a. innri endurskoðun, umbreytingarferli, gerð áreiðanleikakannana, verðmatsvinna og áætlanir. Áður en Ósk hóf störf hjá KPMG starfaði hún sem aðalbókari hjá Hf. Eimskipafélagi Íslands. Einnig starfaði hún í mörg ár í Norfolk í Virginia fylki í Bandaríkjunum, fyrst sem aðstoðarfjármálastjóri hjá Eimskip USA og síðar sem fjármálastjóri hjá Samskip Inc. Ósk útskrifaðist sem viðskiptafræðingur með áherslu á endurskoðun frá City University of New York, Baruch College - Zicklin School of Business í maí 2006.
Viðskiptaþróun HNLFÍ